الشيخ خالد الجندي يشكر الرئيس السيسي: دعا للعودة لما كانت عليه المساجد في زمن النبي0

أشاد الشيخ خالد الجندي، عضو المجلس الأعلى للشؤون الإسلامية، بتوجيهات السيد الرئيس عبد الفتاح السيسي بفتح المساجد وتفعيل دورها، معتبرًا أن هذا القرار المبارك يعيد للمساجد دورها الحقيقي في حياة المسلمين كما كان في عهد النبي صلى الله عليه وسلم، مؤكدا أن المساجد كانت ولا تزال مراكز إشعاع علمي ودعوي واجتماعي، داعيًا إلى ضرورة الاستفادة منها بما يخدم المجتمع كله.

وقال الشيخ خالد الجندي، خلال حلقة برنامج "لعلهم يفقهون"، المذاع على قناة "dmc"، اليوم الاثنين: "سيادة الرئيس والله دايمًا ربنا يطول عمره، دايمًا سبّاق بالخير، ودايمًا بيفتح مجالات خير كثيرة جدًا، إحنا كنا في حاجة إليه".

وأردف: "أنا عاوز أقول لحضرتك: اللي قاله سيادة الرئيس ده هو العودة إلى ما كانت عليه المساجد، أمَّا المساجد اللي بتتقفل دي، ما بقتش مساجد! ده المسجد البنيان العظيم ده يتفتح على 10 دقائق أو ربع ساعة في الصلاة ويتقفل؟! لا، أنا عاوز أقول لحضرتك إحنا محتاجين نرجع نفكر تاني".

وأضاف: "أنا عاوز أديك مثال بسيط: أنا من حي اسمه حي الخليفة، حي الرجولة كلها.. في حي الخليفة عندنا سبيل أم عباس، وشارع الألفي، وشارع الصليبة، كل دي مساجد.. عاوز أحكي لك عاملة إزاي، عشان بعض الناس ما تعرفش، روحوا اتفرجوا على مسجد شيخون القبلي وشيخون البحري - اللي بيقولوا عليه شيخون، لا، هو مسجد شيخون القبلي وشيخون البحري - قدام سبيل ابن عباس، على يمينك وعلى شمالك في الخليفة".

وأكمل قائلاً: "كل مسجد منهم خمسة أدوار! فصول، فصول! كل مسجد في 1000 فصل! يا نهار أبيض! 1000 فصل يعني شيء مرعب، شيء كبير! وكان يُدرّس في تلك الفصول والأروقة، تحت في المسجد أروقة: أروقة الأحناف، والشافعية، والمالكية، والحنابلة، وفوق فصول بقى لكل طلبة المذاهب".

وأضاف بأسف: "1000 فصل كلهم مقفولين للأسف الشديد.. ده تاريخ ده زمن!، ده مش مجرد مبانٍ.. وبعدين كانت في أماكن معيشة للطلاب الوافدين، وأماكن للتدريب، واجتماعات أعضاء هيئة التدريس، ومطابخ لإعداد الطعام للسادة العلماء اللي جايين يدرّسوا".

وأردف: "الكلام ده مش الأزهر، لا، ده غير الأزهر! الأزهر حاجة تانية فوق دماغنا.. أنا عاوز أقول لك: كان شرط لأي واحد يقيم مسجدا إنه المسجد يتفاعل مع أنشطة المجتمع، ويقدّم الفصول بتاعته للطلاب لتعليم العلوم الشرعية.. حياة المسلمين كانت في المساجد، حياة المسلمين لا تغلقوا المساجد.. اسمعوا وصية سيادة الرئيس.. الله يطول عمره".