حلمي عبدالباقي: «أنا اكتشفت نفسي في فرح صحبي»

تحدث المطرب الكبير حلمي عبدالباقي، عن ذكرياته مع الغناء، وبداية مشواره الفني، والمواقف التي تعرض لها في حياته.

وقال عبدالباقي، ببرنامج “سبوت لايت”، المعروض على قناة صدى البلد، تقديم شيرين سليمان: “جيلنا كان محظوظًا، لكن مش محظوظ إعلاميًا، والمتلقي كان مختلف عن دلوقتي، ولما كنا بنعمل أغنية كنا نتوقع أنها رايحة في حتة تانية، لأن المتلقي سميع للأغاني”.

وتابع: “أنا اللي اكتشفت نفسي ومحدش اكتشفني، وأنا من الزقازيق، وكان فيه فرح عندنا والعريس كان صاحبي، وخلاني غنيت”.

واستكمل حديثه: “لما جه العيد القومي لمحافظة الشرقية خلوني أغني في الحفلة دي، ومن ذلك الوقت اكتشفت أني بغني كويس”.

وأضاف: “على مدار حياتي في مواقف كتير لما بفتكرها بضحك، وكنت في كورال الجامعة بغني صولو ومكنتش أعرف يعني إيه موال ومقام، وتعلمت كل ده بالممارسة، ومرة كنت طالع في حفلة تبع الجامعة، وكنت بغني للأستاذ محمد العزبي وكنت مبسوط جدا وقتها، ولما خلصت قولت للأستاذ قطب أيه رأيك؟ فقالي إيه القرف ده عمال تدخل من مقام وتدخل مقام تاني، وكانت نقلة في حياتي وكنت لازم اتعلم واثقف نفسي، وبقيت أعرف من الموسيقيين كل حاجة محتاج أعرفها في المزيكا”.