تامر حسني يوجه رسالة لجمهوره في رمضان: ماتضيعش وقت مع اللي فات محدش هينفعك والعمر بيجري

وجه الفنان تامر حسني كلمة لجمهوره المتابع لحسابه الرسمي بموقع فيسبوك، مع أول يوم من أيام شهر رمضان، وقال: "بروحانيات شهر رمضان الكريم زي ما متعودين إني بحاول من واقع الدنيا ومشواري الشخصي أي شيء بتعلمه لازم أوصله لكم بعيداً عن الفن تماماً".

وتابع: "عمركم شوفتوا حد عايز يطلع خطوة قدام وباصص وراه، أكيد مش هيعرف، طب هل في حد ممكن يبدأ جزء جديد في كتاب حياته وليكن الجزء الثاني وهو قاعد لسه بيقرأ الجزء الأولاني، أكيد لا.. طب يعمل إيه؟".

وواصل: "أقولك أنا، مادام خلص الجزء الأول أو خلصت آخر صفحة في الجزء الأول يقلب الصفحة بس كده، ويركز في حاضره لأن اللي فات مش هيعرف يغير فيه حاجة.. ليه بيضيع وقت مع اللي فات، طب الحاضر أولى، انسى اللي فات يا صاحبي وأقلب الصفحة يلا، وابدأ حالاً، محدش هينفعك والعمر بيجري".

واستطرد: "ولو لسه في ماضيك ومخلصتش الصفحة حاول تخلصها بأحسن طريقة على قد ما تقدر، عشان تفتح الجديدة بروح أجمل، يلا إنسى كل اللي تعبك زمان وكل ما تحبط افتكر إنك مادام صحيت ليوم جديد ولسه عايش ما موتّش، اعرف إن لسه ربنا عايز منك حاجات يعني ليك لازمة كبيرة جداً، يلا قوم دور عليها وإقلب الصفحة، وابدأ بصفحة جديدة جميلة زيك".

وتابع، "والله والله ده كلام حقيقي من واقع الحياة ومن واقع تجربة أي حد حلم، وقدر يحقق أحلام، مادام صحيت أنت ليك لازمة قوم يلا أقلب الصفحة".

يذكر أن البعض تعامل مع نصائح تامر حسني على إنها خلاصة تجربته بعد طلاقه من الفنانة بسمة بوسيلي، والأزمات التي لاحقت هذا الطلاق من تصريحات بسمة ضد تامر في لقاء تليفزيوني أجرته، وعرضتها لهجوم شديد.